Geformaliniseerde, aluminiumhidroksied gel geadsorbeerde polivalente suspensie van Pasteurella haemolytica tipes 2, 5, 6, 9 en 15 bakterieë vir die beheer van Pasteurella infeksies in skape en bokke.

Bewaar die entstof by 'n temperatuur van 4 °C tot 8 °C, in 'n yskas.
Moet nie die entstof na die vervaldatum wat op die bottel gedruk is gebruik nie.

AANBEVELINGS VIR GEBRUIK
Skape en bokke van alle ouderdomme word aangetas en die siekte veroorsaak gewoonlik verskillende grade van longontsteking (bontlong en harslagsiekte) en Pasteurella-bakterieë is ook een van die oorsake van mastitis (blou-uier).
Pasteurella infeksies gaan dikwels met infeksies van parainfluenza virus, mikoplasma organismes en siektes soos chlamydiose en jaagsiekte gepaard asook spanningstoestande soos koue en droogtes. Ten einde die beste resultate met die entstof te verkry moet hierdie toestande ook bekamp word.
Daar is 'n groot verskeidenheid Pasteurella-bakteriese stamme en slegs die belangrikste stamme word in die entstof ingesluit. Gevolglik sal die entstof in sekere gevalle nie doeltreffend wees nie en indien probleme ervaar word moet 'n veearts geraadpleeg word. Spesiale entstowwe teen spesifieke stamme, wat nie in die standaard entstof opgeneem is nie, is op aanvraag beskikbaar by Onderstepoort Biologiese Produkte.

WAARSKUWINGS
Moet nie diere binne 7 dae na inenting vir menslike verbruik slag nie.
Slegs gesonde diere moet ingeënt word.
Hou buite bereik van kinders, oningeligte persone en diere.
In uitsonderlike gevalle mag Pasteurella entstof skok reaksies veroorsaak.
'n Aantal minder waardevolle diere moet dus eers ingespuit word en vir een uur waargeneem word
voordat die hele kudde ingeënt word.
Alhoewel hierdie produk breedvoerig onder 'n wye verskeidenheid van toestande getoets is, mag
dit faal as gevolg van verskeie redes. Indien dit vermoed word, raadpleeg 'n veearts en verwittig die
registrasiehouer.

GEBRUIKSAANWYSINGS
Gebruik slegs soos voorgeskryf.
Steriliseer spuite en naalde deur dit vir ten minste 15 minute in water te kook.
Moet nie ontsmettingsmiddels of brandspiritus gebruik om spuite en naalde te steriliseer nie. Gebruik 'n afsonderlike naald vir elke dier. Skud die bottel goed voor gebruik. Vermy blootstelling aan hoë temperature en direkte sonlig gedurende inenting.
Diere kan na gelang van omstandighede op enige ouderdom vanaf 2 weke ingeënt word.
Diere wat vir die eerste keer ingeënt word moet twee inspuitings met 'n tussenpose van 4 weke ontvang. 'n Versterkingsinspuiting moet 6 maande later gegee word. Hierna moet 'n enkel inspuiting jaarliks gegee word.

DOSIS: Skape en bokke 2 ml onderhuids

UITWERKING VAN DIE ENTSTOF
Die entstof veroorsaak feitlik geen reaksie nie. 'n Klein knop mag egter by die inspuitplek ontstaan en diere mag tydelik mank wees. Indien dragtige diere ingeënt moet word is dit raadsaam om eers 'n paar diere in te spuit en hulle dop te hou vir 30-60 minute voordat die hele kudde ingeënt word.
Immuniteit ontwikkel ongeveer twee weke na 2de inenting en beskerm die diere vir ongeveer 6 maande maar kan egter nie in alle diere gewaarborg word nie.

VERPAKKING
Beskikbaar in bottels van 50 dosisse.