Vriesgedroogde suspensie van lewende Brucella melitensis Rev. I bakterieë vir die voorbehoedende
inenting van ramlammers teen Brucella ovis.

Bewaar die entstof in 'n yskas by 'n temperatuur van 4 °C tot 8 °C.
Moet nie die entstof na die vervaldatum wat op die bottel gedruk is gebruik nie.

AANBEVELINGS VIR GEBRUIK
B. ovis: Om bybalontsteking te voorkom wat deur B. ovis veroorsaak word, moet ramlammers op 2 tot
4 maande ouderdom ingeënt word. Dit is nie nodig om ooie in te ent nie.

B. melitensis: Dit is 'n seldsame siekte van skape, tans beperk tot die noordelike gedeeltes van Namibië
en moontlik gedeeltes van Limpopo en Mpumalanga. Lammers van beide geslagte word op 2 tot 4
maande ouderdom geïmmuniseer.

WAARSKUWINGS
Moet nie diere binne 3 maande na inenting vir menslike verbruik slag nie.
Slegs gesonde diere moet ingeënt word.
Hou buite bereik van kinders, oningeligte persone en diere.
Die entstof moet onder geen omstandighede by dragtige diere gebruik word nie want dit kan
tot aborsies lei.
Potensieel skadelik vir die mens.
Alhoewel aangeneem word dat die entstof met gewone hantering skadeloos vir die mens is,
moet voorsorg getref word dat mense nie met die entstof ingespuit word nie. Vermy blootstelling
van mense se oë. Indien dit plaasvind, spoel die oë herhaaldelik met vars water uit. In albei
gevalle moet 'n geneesheer geraadpleeg word.
Alhoewel hierdie produk breedvoerig onder 'n wye verskeidenheid van toestande getoets is,
mag dit faal as gevolg van verskeie redes. Indien dit vermoed word, raadpleeg 'n veearts en
verwittig die registrasiehouer.

GEBRUIKSAANWYSINGS
Gebruik slegs soos voorgeskryf.
Sterliseer spuite en naalde deur dit vir ten minste 15 minute in water te kook. Moet nie ontsmettingsmiddels of brandspiritus gebruik om spuite en naalde te steriliseer nie. Gebruik 'n steriele naald vir elke dier.
Die aktiewe bestanddeel van die entstof is in die vorm van 'n poeier in 'n klein botteltjie. Dra ongeveer
5 ml van die steriele verdunningsvloeistof wat verskaf word met 'n steriele spuit oor na die bottel
gedroogde entstof. Meng deeglik totdat die poeier opgelos is en spuit dan die suspensie terug in die
oorgeblewe steriele verdunningsvloeistof. Die entstof is nou gereed vir gebruik en moet dadelik ingespuit
word. Hou die entstof koel en vermy blootstelling aan hoë temperature en sonlig gedurende inenting.
Skud die bottel goed voor gebruik.

DOSIS: 2 ml onderhuids

UITWERKING VAN DIE ENTSTOF
Die entstof veroorsaak geen waarneembare reaksies as dit volgens voorskrif gebruik word nie. Met 'n
enkele inspuiting kan 'n lewenslange immuniteit verwek word maar die entstof sal nie noodwendig
volledige immuniteit in alle diere teweegbring nie.

VERPAKKING
Beskikbaar in bottels van 5 en 50 dosisse